VOV4.Êđê- Blŭ hrăm ti anôk mă bruă hŏng phung kreh knhâo, dŭm êpul êya, phung duh mkra bi ksiêm duah, ba yua, mkra mjing vaccine gang mkhư̆ klei ruă tưp covid 19, lŏ dơ̆ng ruh mgaih djăp mta klei dleh dlan, klei gun kpăk, mtrŭt mđĭ bruă anei hlăm hrue 12/8, ti anôk bruă knŭk kna, Khua knŭk kna Phạm Minh Chính mtă, jih jang anôk bruă, jih jang mnuih mâo bruă klam, bi mâo klei gĭr hĭn, bi mguôp kjăp, tŭ jing hĭn kyua mta kñăm bi mâo vaccine mkra mjing hlăm ala čar pô hnưm hĭn. Blŭ hrăm êlâo kơ mă bruă, Khua knŭk kna Phạm Minh Chính lač, knŭk kna, khua knŭk kna, Êpul bruă ala čar kiă kriê gĭt gai bi ktang, phung ƀuôn sang mđing hĭn kơ hră êlan tlŏ vaccine. Khua knŭk kna mñă “Bi trông lehanăn ngă bi dưi” bruă mkra mjing vaccine hlăm ala čar. Ti anôk mă bruă, phung bi ala ăt bi sa ai ktang hŏng klei mĭn mơ̆ng khua knŭk kna Phạm Minh Chính čiăng kơ jih jang mnuih mâo tlŏ sơăi vaccine, “Mta vaccine jăk hĭn jing vaccine mâo mkăp klei dưi, mâo tlŏ pral hĭn, jăk hĭn, ênŭm hĭn”. Mâo ya mta vaccine, tlŏ vaccine anăn yơh. Phung kreh knhâo bi klă klei tŭ dưn, mơ̆ng djăp mta vačine mâo klei dưi ba yua./.

Pô mblang: Y-Khem Niê