VOV4.Êđê- Hlăm klei bi blŭ hrăm hlăm đĭng blŭ hŏng Tedros Adhanom Ghebreyesus, Knơ̆ng khua gĭt gai Êpul hgŭm bruă mdrao mgŭn dlông rŏng lăn WHO tlam hrue 24/6, Khua knŭk kna Phạm Minh Chính bi êdah klei lač jăk lehanăn bi myuôm klei mjĕ mgiăm hgŭm mbĭt lehanăn jih jang klei gĭr yuôm bhăn mơ̆ng WHO đru leh kơ klei mđĭ kyar bruă mdrao mgŭn Việt Nam hlăm găl 45 thŭn êgao. Ti anăp klei ruă tưp dleh dưi ksiêm dlăng hlăm dŭm boh čar, ƀuôn prŏng ti Việt Nam ară anei kyua mta kman mlih mrâo, Khua knŭk kna akâo kơ WHO đru kơ Việt Nam tal êlâo hĭn čiăng pral dưi mâo ênoh vaccine hlăm hdră COVAX msĕ si klei ƀuăn leh, ƀuăn srăng ngă klei tlŏ mgang mâo klei tŭ dưn, pral lehanăn êđăp ênang.

Lehanăn, Khua knŭk kna lŏ akâo kơ WHO sa ai đru kơ Việt Nam dưi jing anôk mkra mjing vaccine kơ alŭ wăl Yŭ Pacifĭk; mñă klă klei dưi mơ̆ng dhar bruă mdrao mgŭn Việt Nam, lehanăn jih jang klei găl mơ̆ng phung duh mkra Việt Nam srăng dưi mkra mjing vaccine djăp hŏng ênoh čuăn tar rŏng lăn. Khua knŭk kna bi mni klei Knơ̆ng khua gĭt gai Êpul hgŭm bruă mdrao mgŭn brei tiŏ nao phung truăn kơ bruă WHO đru Việt Nam hlăm bruă anei./.

Pô mblang: Y-Khem Niê