VOV4.Êđê- Tlam 5-9, Khua Knŭk kna Phạm Minh Chính,  Khua Anôk bruă gĭt gai ala čar gang mkhư̆ klei ruă Covid-19 gĭt gai leh klei bi kƀĭn online kluôm ala Anôk bruă gĭt gai ala čar gang mkhư̆ klei ruă Covid-19 hŏng dŭm alŭ wăl kơ bruă gang mkhư̆ klei ruă Covid-19. Klei bi kƀĭn dưi mkŏ hŏng êbeh 9 êbâo anôk ti dŭm să, ƀuôn hgŭm, wăl krah, kdriêk čar, kdriêk, buôn prŏng, čar hlăm kluôm ala. Khua Knŭk kna mñă klă, klei bi kƀĭn mă boh phŭn jing bi trông kơ bruă fang mkhư̆ k;lei ruă tưp ti să, ƀuôn hgŭm wăl krah leh anăn lač êlam kơ bruă sĭt hluê ngă klei bi ktlah yang ƀuôn snăn să, ƀuôn hgŭm, wăl krah si bĕ ngă, mnuih ƀuôn sang si bĕ ngă. Khua phŭn bruă mdrao mgŭn Nguyễn Thanh Long brei thâo, boh klei ruă tưp dleh ktuê dlăng, gưl bluh mâo tal 4 mphŭn mơ̆ng hruê 27/4/2021 truh hruê 5/9/2021, mâo êbeh 520 êbâo čô mnuih ruă, giăm 289 êbâo čô mnuih hlao leh (55%) leh anăn giăm 13 êbâo čô mnuih djiê; Kluôm ala tlŏ leh vaccin kơ êbeh 21 êklăk 5 êtuh êbâo aruăt, mâo giăm 30% ênoh mnuih mơ̆ng 18 thŭn kơ dlông. Khua Knŭk kna mtă mkŏ mjêč hŏng lu khua gĭt gai să, ƀuôn hgŭm, kdriêk, kdriêk čar mâo klei ruă tưp dleh ktuê dlăng hlăm kluôm ala. Knŭk kna lŏ dơ̆ng ksiêm dlăng pô kiă kriê ti nah gŭ tăp thâo kơ boh klei ruă tưp, hdră gang mkhư̆, dŭm klei mĭn gĭt gao mơ̆ng gưl dlông leh anăn lŏ mâo dŭm klei êmuh kơ bruă mdrao mgŭn phung F0, bruă ksiêm mkă, rơ̆ng klei hdĭp mda ala ƀuôn.

Pô mblang: H’Zawut Ƀuôn Yă