VOV4.Êđê- Tlam hruê 19/8, Khua knŭk kna Phạm Minh Chính mâo leh hdră bi trông hluê êlan đĭng blŭ hŏng Khua knơ̆ng Êpul group AstraZeneca Pascal Soriot. Ti anôk bi trông, khua knŭk kna mñă klă, vaccine AstraZeneca jing sa hlăm dŭm mta vaccine dưi ba yua lu hlăm tar rŏng lăn, truh êbeh 65% hnơ̆ng vaccine mâo Việt Nam dưi tŭ mă truh kơ ară anei, đru mguôp yuôm bhăn hlăm klei gĭr msưh kdŭn klei ruă tưp hlăm tar rŏng lăn lehanăn ti Việt Nam.

Hlăk klei ruă Covid 19 dôk mâo dleh dưi ksiêm dlăng, Khua knŭk kna akâo kơ Khua knơ̆ng Êpul group AstraZeneca mđing dlăng, gĭt gai pral hĭn hdră ba jao vaccine kơ Việt Nam, tal êlâo hĭn jing klei ƀuăn rơ̆ng ba jao 8 êklăk hnơ̆ng vaccine hlăm mlan 8 mbĭt anăn mđĭ hĭn klei gĭr bi leh klei kuôl kă lŏ mkăp thiăm vaccine kơ Việt Nam hlăm mlan 9 thŭn 2021 lehanăn hdră kčah truh kơ knhal jih thŭn 2021. Khua knŭk kna ba mdah lehanăn čiăng kơ êpul group AstraZeneca ksiêm dlăng, bi trông hŏng dŭm ala čar mkăn kñăm dưi ba jao hnơ̆ng vaccine; mbĭt anăn mtrŭt mđĭ dŭm klei kuôl kă blei vaccine kơ phung hđeh lehanăn mnuih gŭ 18 thŭn, mnuih huĭ srăng ênưih mâo klei ruă tup, mnuih mâo klei ruă mkăn./.

Pô mblang: H’Nêč Êñuôl