VOV4.Êđê- Tlam hruê 19/7/2021, Khua knŭk kna Phạm Minh Chính bi trông leh hluê êlan đĭng blŭ hŏng Khua mil čhil Philipines Rodrigo Duterte ƀri bi hdơr 45 thŭn hruê mkŏ mjing klei bi mjĕ Việt Nam-Philippines (12/7). Khua knŭk kna Phạm Minh Chính mñă klă, Philippines jing ƀĭng hgŭm bruă yuôm bhăn, đăo knang, mâo lu klei mđing dlăng lehanăn ba wĭt klei tŭ dưn kơ Việt Nam, mñă klă klei bi mjĕ dua ala čar amâo mdei mđĭ mlih, lŏ bi kjăp, ksŭl mbŭ dăl hlăm 45 thŭn êgao mơ̆ng leh mkŏ mjing klei bi mjĕ.

Dua khua kiă kriê tŭ ư bi hgŭm kjăp hĭn kñăm mtrŭt mđĭ klei bi mjĕ Việt Nam-Philippines hlăm djăp mta ra bruă, mđing kơ dŭm bruă phŭn msĕ si: Pŏk ngă tŭ dưn Hdră ngă bruă wưng thŭn 2019 – 2024, mtrŭt mđĭ hdră bi trông hluê êpul, bi tuôm gưl dlông lehanăn dŭm gưl, pral pŏk ngă dŭm klei bhiăn bi hgŭm bruă hluê hdră pral hĭn, lŏ dơ̆ng hluê ngă dŭm bruă bi hdơr 45 thŭn hruê mkŏ mjing klei bi mjĕ, mtrŭt mđĭ lehanăn mtrŭn agha êlam hĭn hdră bi hgŭm hlăm bruă lĭng kahan – răng mgang klei êđăp ênang, mnia mblei mnơ̆ng điện tử, mjing klei găl lehanăn mtrŭt mđĭ anôk bruă duh mkra dua ala čar duh bi liê, mnia mblei hlăm dŭm bruă dua tĭng mâo klei găl prŏng./.

                                                    Pô mblang: H’Nêč Êñuôl