VOV4.Êđê- Khua knŭk kna Phạm Minh Chính mrâo mâo klei bi tuôm hŏng mnuih mâo bruă tŭ dưn hŏng cách mạng, găp djuê phung kahan djiê êngiă ƀri bi hdơr 74 thŭn Hruê kahan êka êkeh – Djiê êngiă (27/07/1947-27/07/2021). Ti anôk bi tuôm, 50 čô bi ala mnuih mâo bruă tŭ dưn bi ala kơ klei gĭr ktưn kpưn đĭ, ai tiê hgao klei dleh dlan hlăm klei hdĭp, đru mguôp jih ai tiê pô hlăm hdră mkŏ mkra lehanăn mđĭ kyar lăn čar bi ala kơ êbeh 9,2 êklăk čô mnuih mâo bruă tŭ dưn hlăm kluôm ala lŏ bi hdơr leh kơ ênuk bi blah mtlaih êngiê djuê ana. 

 Blŭ hrăm ti anôk bi tuôm, Khua knŭk kna Phạm Minh Chính bi ala phung khua kiă kriê Đảng, Knŭk kna, ba m’ĭt truh kơ phung mă bruă cách mạng sui thŭn mlan, phung amĭ Việt Nam jhŏng ktang, phung kahan Jhŏng ktang djă phao ktuang, phung kahan êka êkeh, kahan ruă duam, găp djuê kahan djiê êngiă, mnuih mâo bruă tŭ dưn hŏng cách mạng klei lač jăk lehanăn hdơr knga prŏng prĭn. Khua knŭk kna mñă klă klei lač jăk mguôp hŏng klei đua klam jing nanao klei mđing uêñ hlăm klei mĭn lehanăn bruă ngă mơ̆ng phung khua kiă kriê dŭm gưl, hlăm mnuih ƀuôn sang lehanăn anei ăt jing knhuah dhar kreh jăk siam mơ̆ng djuê ana drei./.

Pô mblang: H’Nêč Êñuôl