VOV4.Êđê -  Tlam mbruê (12/7), khua knŭk kna Phạm Minh Chính mâo leh klei blŭ hrăm êlan đĭng ƀlŭ hŏng khua knŭk kna Israel Naftali Bennett. Khua knŭk kna Naftali Bennett yap yuôm bhăn dŭm bruă ngă mơ̆ng ala čar Việt Nam hlăm bruă gang mkhư̆ klei ruă tưp Covid-19, ăt msĕ hŏng bruă mđĭ kyar bruă duh mkra - ala ƀuôn lehanăn bruă hŏng tač êngao. Khua knŭk kna Israel lŏ mñă klă, ala čar Israel yap yuôm bhăn lehanăn lŏ mđĭ hĭn klei bi mguôp hŏng ala čar Việt Nam hlăm lu bruă. Khua knŭk kna Phạm Minh Chính ăt mâo klei hơêč hmưi kơ Naftali Bennett dưi čuăn ruah jing khua knŭk kna ala čar Israel. Hlăm wưng klei ruă tưp Covid-19 dôk dleh dưi ktuê dlăng, khua knŭk kna Phạm Minh Chính hmăng hmưi 2 nah lŏ mâo klei bi mguôp hĭn hlăm bruă gang mkhư̆ klei ruă tưp Covid-19. 2 čô khua knŭk kna mâo klei bi tŭ ư srăng bi mguôp 2 ala čar hlăm lu bruă, ƀrư̆ hruê klă mngač lehanăn tŭ dưn hĭn, bi hmar klei blŭ hrăm, bi klă klei mnia mblei êngiê lehanăn klei hgŭm bruă plah wah 2 ala čar, mâo klei kñăm mđĭ bruă duh bi liê, mnia mblei 2 nah, mđing truh bruă krŭ wĭt bruă duh mkra leh jih klei ruă tưp.

Y Ƀel pô mblang