VOV4.Êđê - Ti anôk bruă knŭk kna, Khua knŭk kna Phạm Minh Chính mâo leh mmông drông aduôn Victoria Kwakwa, K’iăng khua knơ̆ng prăk tar rŏng lăn WB klam dlăng kơ bruă krĭng Ngŏ Asi lehanăn Pacifĭk mâo leh gưl hriê čhưn lehanăn mă bruă ti Việt Nam. Hlăm ai êwa m’ak hlak, h’uh mđao, Khua knŭk kna bi mni kơ aduôn Victoria Kwakwa hriê čhưn kơ Việt Nam mñă WB jing ƀĭng hgŭm mđĭ kyar yuôm bhăn hrăm mbĭt đru mguôp hlăm hdră mđĭ kyar bruă duh mkra – ala ƀuôn mŏng Việt Nam; mbĭt anăn bi mni kơ WB mâo leh lu hdră mtrŭn đru kčĕ tŭ dưn, djŏ guôp hŏng hdră êlan, mta kñăm mđĭ kyar mơ̆ng Việt Nam hlăm dŭm ênuk gưl. Khua knŭk kna lač jăk kơ WB đru leh kơ Viêt Nam dưi bi kdung wưng tla jih prăk čan IDA čiăng lŏ mâo phŭn prăk yua hlăm hdră gang mkhư̆ klei ruă lehanăn krơ̆ng kjăp hnơ̆ng đĭ kyar bruă duh mkra, bi mni klei mĭn mrâo mơ̆ng WB đru leh kơ dŭm ala čar gang mkhư̆ klei ruă Covid 19 hlăm anăn mâo Việt Nam./.

H Nêč pô mblang