VOV4.Êđê - Aguah mbrue (29/7), ti anôk bruă knŭk kna, Khua knŭk kna Phạm Minh Chính drông leh khua bi ala knŭk kna Cuba Orlando Nicolas Hernandez Guillen hriê kkuh čhưn. Ti anôk bi tuôm, hlăm klei bi mguôp, h’uh mđao, sĭt suôr, khua knŭk kna Phạm Minh Chính hơêč hmưi kơ khua bi ala knŭk kna Cuba Orlando Nicolas Hernandez Guillen ba mdah leh hră hriê păn bruă hŏng khua lăn čar hlăm hrue 13/7, lehanăn mñă knŭk kna srăng mđing hĭn gĭt gai dŭm phŭn dhar bruă đru mjing djăp klei găl kơ khua bi ala bi leh jăk bruă čuăn ti Việt Nam.

Khua knŭk kna mñă Việt Nam dlăng yuôm klei bi mguôp siă suôr, đăo knang hŏng Cuba, mâo leh khua gĭt gai Hồ Chí Minh lehanăn khua gĭt gai Fidel Castro mkŏ mjing, lehanăn mâo lu gưl phung khua kiă kriê, phung ƀuôn sang dua ala čar amâo mâo mdei ksul mbŭ, lehanăn sa ai hlăm êbeh 60 thŭn êgao. Boh nik hlăm wưng giăm anei, dŭm phŭn dhar bruă dua ala čar jih ai tiê mghaih msir djăp mta klei dleh dlan kyua klei ruă tưp covid 19, lehanăn jih ai tiê lŏ bi kjăp, mđĭ hĭn klei hgŭm hlăm djăp mta./.

Y Khem pô mblang