VOV4.Êđê - Tlam 3/8, Khua knŭk kna Phạm Minh Chính drông Khua bi ala Nga ti Việt Nam Bezdetko nao kkuh čhưn. Khua knŭk kna bi mklă Việt Nam hdơr nanao leh anăn hdơr knga kơ klei đru yuôm bhăn mơ̆ng Liên Xô êlâo dih leh anăn Liên bang Nga hruê anei brei leh kơ Việt Nam hlăm klei krŭ kdơ̆ng suă mă klei êngiê leh anăn mđĭ kyar lăn čar.

Khua knŭk kna mơak ƀuh klei bi hgŭm plah wah dua ala čar lŏ dơ̆ng đĭ kyar jăk, lŏ dơ̆ng bi tuôm dŭm gưl, mâo gưl dlông dưi mđĭ lar nanao hŏng klei bi blŭ hrăm hlăm đĭng blŭ leh anăn online. Khua bi ala Nga Bezdetko bi mklă Việt Nam jing ƀĭng hgŭm mđing tal sa mơ̆ng Liên bang Nga ti krĭng Asi- Pacific, bi tŭ ư hŏng klei ksiêm dlăng, tă hdră leh anăn dŭm hdră msir mđĭ klei bi hgŭm dua ala čar mơ̆ng Khua knŭk kna Phạm Minh Chính lač leh anăn bi mklă srăng gĭr đru mguôp kñăm mkra mđĭ leh anăn hyuă kjăp hĭn klei bi hgŭm plah wah Việt Nam- Nga.

H Zawut pô mblang