VOV4.Êđê- Tlam 28-5, ti anôk bruă knŭk kna, Khua Knŭk kna Phạm Minh Chính drông leh Alok Sharma, Khua phŭn bruă hŏng tač êngao  Anh, Khua Klei bi kƀĭn tal 26 dŭm tĭng hgŭm hlăm Klei kuôl kă jar mơ̆ng LHQ kơ klei bi mlih yan diê COP26), hlăk mâo gưl hriê čhưn leh anăn mă bruă ti Việt Nam. Ti mmông drông, dua tĭng bi trông leh kơ lu mta bruă klă klơ̆ng, klă sĭt, tŭ dưn čiăng lŏ dơ̆ng ba klei bi hgŭm Việt Nam - Anh đĭ kyar jăk, hlăm boh klei dlông rŏng lăn dôk tlă anăo hŏng lu klei lông dlăng mrâo, boh nik klei bi mlih yan adiê leh anăn klei ruă Covid-19.

Khua Knŭk kna mtă kơ Knŭk kna Anh lŏ dơ̆ng đru Việt Nam ngăn prăk kdrăp mrâo, klei thâo hlăm bruă bi mlih jing bruă duh mkra mâo ƀiă carbon leh anăn mđĭ klei dưi mdrơ̆ng hŏng klei bi mlih yan adiê, boh nik dŭm krĭng wăl hlăk ƀrư̆ hmaĭ kjham mơ̆ng klei bi mlih yan adiê leh anăn êa ksĭ đĭ. Khua COP26 Alok Sharma bi mklă Anh srăng lŏ dơ̆ng đru Việt Nam hlăm klei mdrơ̆ng hŏng klei bi mlih yan adiê, mâo mđĭ pral klei đĭ kyar kơ êa pui êwa čuh doh.

Pô mblang: H’Zawut Ƀuôn Yă