VOV4.Êđê -  Tlam hruê 24/5, ti sang bruă knŭk kna, khua knŭk kna Phạm Minh Chính gĭt gai klei kƀĭn knŭk kna kơ bruă gang mkhư̆ klei ruă tưp Covid-19. Blŭ hlăm bi kƀĭn, khua knŭk kna mñă klă, hruê kăm êgao klei ruă tưp ăt dleh dưi ksiêm dlăng lehanăn đĭ lar pral, boh nĭk jing dŭm anôk bruă tuh tia. Knŭk kna, khua knŭk kna, êpul bruă gĭt gai bruă gang mkhư̆ klei ruă tưp Covid-19 mâo leh klei gĭt gai kjăp, dưi mâo klei nao hgŭm dŭm gưl bruă Đảng, knŭk kna lehanăn mnuih ƀuôn sang, hŏng klei čiăng dưi bi hrŏ klei ruă tưp.

Khua knŭk kna mñă klă, dưi ksiêm dlăng klei ruă tưp Covid-19 đru kơ bruă dưi bi leh klei ruah khua ngă Pô bi ala Quốc Hội gưl 15 lehanăn HĐND dŭm gưl wưng thŭn 2021-2026. Khua knŭk kna mtă, čiăng mâo klei mkiêt mkriêm kơ dŭm bruă amâo jăk čiăng lehanăn kñăm kơ blei vaccine, iêu mthưr kơ dŭm ngăn prăk djŏ klei bhiăn mkăn jing ênoh prăk blei vaccine. Dŭm phŭn, dhar bruă gưl dlông čiăng mâo klei bi êdah mkŏ mjing keh prăk vaccine tui hluê ai tiê iêu mthưr kơ jing jang mnuih ƀuôn sang, phung mnuih đru hŏng klei bi êdah klă mngač kơ klei bi mguôp lehanăn klei yua prăk kăk.