VOV4.Êđê - Khua knŭk kna Phạm Minh Chính mrâo mâo asăp mtrŭn kơ bruă mđĭ hĭn dŭm hdră êlan gang mkhư̆ klei ruă tưp Covid-19, ksiêm dlăng kman mlih mrâo Omicron mơ̆ng kman SARS-CoV-2. Khădah ară anei hlăm ala čar ka mâo ôh mnuih mâo klei ruă kyua mlan Omicron, ƀiădah ênoh mnuih ruă, mnuih ruă đĭ kjham, djiê ăt dôk mâo klei đĭ leh anăn bruă mdrao mgŭn nah gŭ hlăm đa đa alŭ wăl truh leh klei êgao hnơ̆ng. Ti anăp klei anei leh anăn klei hyưt kman Omicron srăng mâo hlăm ala čar drei jing lu êdi, Khua knŭk kna mtă kơ phŭn bruă mdrao mgŭn ksiêm dlăng kơ boh sĭt klei ruă tưp dlông rŏng lăn, mjêč ngă bruă mtô mjuăt leh anăn bi klă gưl klei ruă tưp, dŭm hdră êlan gang mkhư̆ klei ruă tưp djŏ guôp hŏng boh sĭt klei ruă tưp leh anăn klei hyưt mơ̆ng kman Omicron. Jih jang phŭn, dhar bruă, bruă sang čư êa dŭm čar, ƀuôn prŏng mđĭ hĭn klei gĭt gai dŭm hdră êlan gang mkhư̆ klei ruă tưp.

Y - Ƀel pô mblang