VOV4.Êđê- Aguah mbrue (1/7), ti anôk bruă knŭk kna, khua knŭk kna Phạm Minh Chính kiă kriê leh klei knŭk kna bi kƀĭn kơ tuôr mlan 6. Ti anôk bi kƀĭn anei, Knŭk kna hmư̆, lehanăn trông čhai kơ 6 klei hâo mdah kơ dŭm bruă, êpul bruă: Kơ boh klei duh mkra ala ƀuôn mlan 6 lehanăn 6 mlan akŏ thŭn 2021; ksiêm wĭt bruă kiă kriê, gĭt gai mơ̆ng knŭk kna kơ klei mđĭ mlih bruă duh mkra, mđĭ hnơ̆ng dưi bi ktưn hnơ̆ng ala čar hlăm 6 mlan akŏ thŭn, lehanăn bruă čuăn, hdră kñăm phŭn kơ 6 mlan knhal jih thŭn 2021.

Kơ hdră khăt bi hrŏ, bi ênưih djăp mta hdră mtrŭn djŏ tuôm kơ bruă duh mkra mnia mblei hlăm 6 mlan knhal jih thŭn, lehanăn kơ dŭm bruă yuôm bhăn mkăn. Blŭ hrăm ti anôk bi kƀĭn, Khua knŭk kna Phạm Minh Chính lač, klei bi kƀĭn tal anei mâo klei yuôm bhăn, bi myuôm bruă duh mkra ala ƀuôn, bruă knŭk kna kiă kriê 6 mlan akŏ thŭn lehanăn bi trông kơ kơ dŭm bruă hlăm 6 mlan knhal jih thŭn. Mbĭt anăn mâo lu bruă yuôm bhăn mkăn, boh nik, ară anei jing bruă mdrơ̆ng hŏng klei ruă tưp covid 19, ruh mgaih klei dleh dlan mtrŭt mđĭ bruă duh mkra mnia mblei./.

Pô mblang: Y-Khem Niê