VOV4.Êđê- Aguah mbrue (8/7), ti anăp klei đĭ lêč pral mơ̆ng klei ruă tưp covid 19 ti ƀuôn prŏng Hồ Chí Minh, leh mâo klei bi tŭ ư klei ƀuôn prŏng akâo ba yua asăp mtrŭn mrô 16, Khua knŭk kna Phạm Minh Chính kiă kriê leh klei bi kƀĭn onlie hŏng phung khua kiă kriê ƀuôn prŏng Hồ Chí Minh bi trông kơ hdră êlan, lehanăn iêu mthưr phung ƀuôn sang hrăm mbĭt hŏng bruă kđi čar čiăng mkŏ mjing bruă mdrơ̆ng hŏng klei ruă tưp covid 19 hŏng klei tŭ dưn.

Khua knŭk kna bi myuôm klei gĭr mơ̆ng ƀuôn prŏng Hồ Chí Minh, klei kiă kriê, gĭt gai mơ̆ng gưl bruă Đảng, bruă sang čư̆ êa djăp gưl. Siămdah truh kơ ară anei klei ruă tưp ti ƀuôn prŏng ăt adôk dleh dưi ksiêm dlăng. Tui si klei ƀuôn prŏng akâo, Êpul phung khua kiă kriê knŭk kna, khua knŭk kna mâo leh klei tŭ ư ba yua hdră ktang hĭn, hluê nga asăp mtrŭn mrô 16 kwang dar jih ƀuôn prŏng Hồ Chí Minh hlăm 15 hrue pioh gang mkhư̆ klei tưp lar mơ̆ng klei ruă tưp. Khua knŭk kna mñă, ngă klei bi ktlah hlăm yang ƀuôn, ƀiădah kiă kriê kjăp klei hdĭp phung ƀuôn sang, rơ̆ng kjăp klei êđăp ênang yang ƀuôn, jih jang mnuih bi mâo klei suaih pral. bruă gang mkhư̆ klei ruă tưp Covid 19 mkăp vaccine kơ ƀuôn prŏng Hồ Chí Minh yơh jing bruă tal êlâo./.

 Pô mblang: Y-Khem Niê