VOV4.Êđê- Aguah mbrue (26/8), khua knŭk kna Phạm Minh Chính nao ksiêm dlăng leh anôk bi ktlah gưl să, ƀuôn hgŭm kơ phung F0, lehanăn F1 ti Thủ Đức, ƀuôn prŏng Hồ Chí Minh. Khua knŭk kna nao čuă anôk đru mjêč kơ klei hdĭp mda ala ƀuôn ti Sang dhar kreh ƀuôn hgŭm Cát Lái. Tui si Nguyễn Minh Điền khua bruă Đảng ƀuôn hgŭm Cát Lái, ƀuôn hgŭm mâo 47 êpul anôk dôk, hŏng êbeh 6 êbâo gŏ êsei. Tiŏ nao mâo 400 čô mnuih nao đru mkăp mnơ̆ng mnua yua, nao sang mnia brei. Dŭm gŏ êsei giăm ƀun mâo đru truh kơ 3 blư̆, grăp blư̆ 1 êklăk 500 êbâo prăk. Ară anei adôk dua krĭng huĭ hyưt hĭn yap jing krĭng hrah. Leh hmư̆ klei hâo mdah ti alŭ wăl ƀuôn hgŭm Cát Lái, Khua knŭk kna mtă hlăm wưng kơ anăp ƀuôn prŏng ngă klei bi kbưi hnêč ti mmông găl nao bi mkă dlăng kman tui duah F0, mbĭt hŏng anăn rơ̆ng kơ klei hdĭp mda ala ƀuôn. Phung ƀuôn sang bi mâo klei mdrao mgŭn pral hĭn. Khua knŭk kna mtă bi mkŏ mjing mtam anôk kiă kriê, sang êa drao kăp hiu mdrao, amâo mâo djŏ knŏng kơ klei ruă tưp covid 19 ƀiădah mdrao wăt klei ruă mkăn. Khua knŭk kna ksiêm dlăng anŭng kơ klei hdĭp mâo mnơ̆ng ƀơ̆ng hua, êa drao gŭn, srăng mbha kơ phung ƀuôn sang 3 hrue sa blư̆. Khua knŭk kna mtă kơ ƀuôn hgŭm mprăp kơ phung ƀuôn sang amâo mâo djŏ knŏng kơ sa hrue ƀiă dah sui hĭn čiăng dưi mâo djăp mnơ̆ng yua êjai dôk hlăm klei bi ktlah./.

Pô mblang: H’Nêč Êñuôl