VOV4.Êđê- Tlam mbrue (31/8), Khua knŭk kna Phạm Minh Chính nao ksiêm dlăng leh sang êa drao mdrao mnuih ruă Covid 19 ti Hà Nội, dôk hlăm Sang êa drao Sang hră gưl prŏng bruă mdrao mgŭn Hà Nội ti ƀuôn hgŭm Yên Sở, kdriêk čar Hoàng Mai, ƀuôn prŏng Hà Nội, lehanăn ksiêm dlăng hlăm dŭm anôk mâo klei ruă tưp covid 19 hlăm kdriêk čar Thanh Xuân, Hà Nội. Ti anôk bi kƀĭn hŏng phung khua kiă kriê ƀuôn prŏng Hà Nội mâo mkŏ mjing leh ksiêm dlăng jih anôk mâo klei ruă tưp, ksiêm dlăng boh klei hlăm alŭ wăl, Khua knŭk kna Phạm Minh Chính lač klă, klei ruă tưp hlăk dleh dưi ksiêm dlăng, phung ƀuôn sang Hà Nội kbiă hiu hlăm êlan ăt lu, kyuanăn, Khua knŭk kna lač, êjai dôk hlue ngă asăp mtrŭn mrô 16 snăn jing ka mâo klei tŭ dưn. Khua knŭk kna mtă kơ să, ƀuôn hgŭm bi mkŏ mjing ksiêm dlăng ktrâo atăt. Mă bruă hŏng klei pral, bi hrŏ wưng kăm ghă. Să, ƀuôn hgŭm bi tŭ jum, dlăng kriê mdrao mgŭn mnuih ruă, ba yua bruă mdrao mgŭn truh ti dŭm anôk giăm phung ƀuôn sang hĭn, čiăng bi hrŏ ênoh mnuih djiê, amâo mâo bi gun kpăk êlan klông, amâo mâo bi ktrŏ kơ sang êa drao nah dlông, lehanăn mtă kơ jih jang mnuih hơĭt ai tiê mdrao mgŭn amâo mâo klei kdjăt kƀla./.

Pô mblang: Y-Khem Niê