VOV4.Êđê- Hruê 27/6, Khua knŭk kna Phạm Minh Chính mă leh bruă hŏng Anôk bruă Đảng čar Đồng Nai kơ hdră gang mkhư̆ klei ruă Covid 19 lehanăn hdră mđĭ kyar bruă duh mkra ala ƀuôn, bruă lĭng kahan răng mgang klei êđăp ênang 6 mlan akŏ thŭn 2021, bruă klam, hdră msir phŭn hlăm 6 mlan knhal jih thŭn 2021. Leh hmư̆ klei hưn mdah mơ̆ng čar Đồng Nai lehanăn dŭm klei blŭ mơ̆ng dŭm Phŭn, dhar bruă, Khua knŭk kna bi mni kơ dŭm boh tŭ mâo čar Đồng Nai dưi mâo, klei ruă tưp dưi ksiêm dlăng, bruă duh mkra – ala ƀuôn h’ĭt kjăp, hluê ngă jăk hdră đru kơ yang ƀuôn. Khua knŭk kna bi mklă, Đồng Nai mâo bruă klam phŭn hŏng krĭng wăl lehanăn hŏng dŭm ala čar, brei rơ̆ng kjăp bruă hluê ngă hdră kñăm mdua.

Ară anei klei ruă tưp dôk mâo dleh dưi ksiêm dlăng, brei drei mprăp jăk ai tiê, mprăp ai, hdră mdrơ̆ng hŏng klei truh jhat huĭ bluh mâo. Brei Đồng Nai bi hgŭm kjăp hŏng dŭm Phŭn, dhar bruă kñăm msir mghaih dŭm bruă djŏ tuôm kơ hdră mtrŭn, ruh mtlaih klei gun kpăk hlăm hdră mđĭ kyar bruă duh mkra./.

Pô mblang: H’Nêč Êñuôl