VOV4.Êđê- Tlam mmăt hruê 26/8, leh ksiêm dlăng hdră gang mkhư̆ klei ruă tưp ti alŭ wăl, Khua knŭk kna Phạm Minh Chính, Khua anôk bruă ala čar gĭt gai hdră gang mkhư̆ klei ruă Covid 19 mă leh bruă hŏng ƀuôn prŏng Hồ Chí Minh kơ bruă mđĭ hĭn hdră bi ktlah yang ƀuôn lehanăn hluê ngă dŭm hdră msir kñăm gang mkhư̆ klei ruă Covid 19 ti alŭ wăl ƀuôn prŏng. Êlâo anăn, mơ̆ng ưm aguah truh kơ tlam, Khua knŭk kna nao leh ti dŭm anôk hlăm alŭ wăl ƀuôn prŏng čiăng ksiêm dlăng hdră bi ktlah yang ƀuôn, hdră mkăp dŭm mta mnơ̆ng yua kơ klei hdĭp mnuih ƀuôn sang hluê hŏng ai tiê amâo lui hlei pô ư̆ êpa, amâo mâo mnơ̆ng ƀơ̆ng huă, ba hdră bruă mdrao mgŭn truh giăm mnuih ƀuôn sang hĭn, mkŏ ti dŭm să, ƀuôn hgŭm, wăl krah, rơ̆ng kơ mnuih ƀuôn sang dưi dưn hdră anei giăm hĭn, djăp anôk, djăp mmông mtam. Blŭ hrăm ti anôk mă bruă, Khua knŭk kna Pham Minh Chính lač klă, hdră hiu čhưn, mă bruă kñăm tĭng dlăng kluôm bruă pŏk hdră bi ktlah yang ƀuôn lehanăn dŭm hdră msir kñăm gang mkhư̆ klei ruă Covid 19 ti alŭ wăl ƀuôn prŏng mơ̆ng hruê 23/8. Khua knŭk kna mtă kơ phung bi ala bi trông čhai, tĭng dlăng dŭm hdră msir mâo ba mdah, tơdah hdră anei djŏ, dưi hluê ngă snăn srăng mkŏ mjing hluê ngă mtam, kñăm ba wĭt klei tŭ dưn, pral bi leh bruă msir mghaih dŭm klei bluh mâo./.

Pô mblang: H’Nêč Êñuôl