VOV4.Êđê - Khua knŭk kna Phạm Minh Chính mrâo mâo leh mmông mă bruă hŏng knơ̆ng bruă sang čư̆ êa čar Bình Dương kơ bruă mdrơ̆ng hŏng klei ruă tưp covid 19, lehanăn mđĭ kyar bruă duh mkra ala ƀuôn. leh hmư̆ čar bình Dương hâo mdah kơ bruă mdrơ̆ng hŏng klei ruă tưp, lehanăn klei duh mkra ala ƀuôn, lehanăn klei blŭ mơ̆ng dŭm knơ̆ng dhar bruă.

Khua knŭk kna bi myuôm boh tŭ dưn bruă mdrơ̆ng hŏng klei ruă tưp lehanăn bruă mđĭ kyar klei duh mkra ti čar Bình Dương. klei ruă tưp ăt dưi ksiêm dlăng, klei đĭ kyar bruă duh mkra êbeh 7%, mâo hrui wĭt ngăn prăk kơ knŭk kna truh 60%, klei hdĭp phung ƀuôn sang ka hmăi amâo mâo jăk prŏng ôh, hdră đru ba kơ klei hdĭp mda mâo ngă jăk. Anei jing dŭm gru mngač Bình Dương mâo leh hlăm 6 mlan akŏ thŭn, bi dưn yua jih klei jăk, lŏ dơ̆ng mă lu klei hriăm. Tĭng knăl kơ boh klei ti anăp huĭdah lĕ hlăm klei dleh dlan hĭn, dleh dưi ksiêm dlăng hĭn kyua klei ruă tưp, kyuadah F0 ka nik ôh mơ̆ng phŭn agha. Tơdah amâo mâo dưi mkhư̆ ôh klei ruă tưp sĭt nik srăng hmăi amâo mâo jăk kơ jih bruă kđi čar mơ̆ng ară anei truh kơ jih thŭn, boh nik klei mđĭ kyar bruă duh mkra ala ƀuôn. Mơ̆ng anăn, bi păn kjăp boh klei, mkŏ mjing hdră mă bruă bi djŏ, dưi ngă lehanăn mâo klei tŭ dưn./.

Y Khem pô mblang