VOV4.Êđê - Tlam mmăt hruê 9/8, khua knŭk kna Phạm Minh Chính nao hgŭm lehanăn mâo leh klei blŭ yuôm bhăn ti anôk bi kƀĭn gưl dlông hŏng êlan online hŏng êpul gơ̆ng răng mgang klei êđăp ênang mơ̆ng êpul hgŭm lu ala čar hŏng akŏ “Mđĭ klei êđăp ênang krĭng êa ksĭ: sa hdră bi mguôp tar rŏng lăn”. Anei jing gưl tal êlâo hĭn êpul gơ̆ng răng mgang klei êđăp ênang mơ̆ng êpul hgŭm lu ala čar mkŏ mjing klei kƀĭn klă klơ̆ng kơ bruă klei êđăp ênang krĭng êa ksĭ hlăm wưng mâo lu klei lông dlăng kơ bruă klei êđăp ênang krĭng êa ksĭ hlăm alŭ wăl lehanăn tar rŏng lăn. Hlăm klei blŭ mơ̆ng pô ti klei kƀĭn, khua knŭk kna Phạm Minh Chính bơ̆k bâo leh kơ dŭm hdră êlan mơ̆ng Đảng lehanăn khua knŭk kna Việt Nam kơ krĭng êa ksĭ, hlăm anăn mâo hdră êlan mđĭ kyar anôk bruă duh mkra krĭng êa ksĭ Việt Nam, mâo klei lač brei mđĭ hĭn klei bi mguôp tar rŏng lăn čiăng mgaih msir dŭm klei lông dlăng mbĭt kơ klei êđăp ênang krĭng êa ksĭ, mtrŭt mđĭ klei bi mpŭ, ngă djŏ klei bhiăn tar rŏng lăn, boh nĭk jing klei kuôl kă mơ̆ng êpul hgŭm lu ala čar kơ klei bhiăn hlăm êa ksĭ thŭn 1982 lehanăn rơ̆ng kơ klei dưi, klei jăk kơ dŭm ala čar mâo êa ksĭ. Mbĭt anăn dưi bi êdah bruă klam, đru mguôp bruă ngă mơ̆ng Việt Nam hŏng dŭm bruă êpul gơ̆ng răng mgang klei êđăp ênang mơ̆ng êpul hgŭm lu ala čar lehanăn tă hdră kơ klei bi trông kơ krĭng êa ksĭ lehanăn dŭm klei bi kƀĭn lu tĭng.

Y Ƀel pô mblang