VOV4.Êđê -  Klei kƀĭn trông ƀĭng hgŭm kơ bruă mđĭ kyar mtah lehanăn klei kñăm tar rŏng lăn (P4G) 2030 mkŏ mjing mơ̆ng hruê 30; 31/05/2021 hlăm trực tuyến ti gŭ klei gĭt gai mơ̆ng khua mil čhil Hàn Quốc Mun Chê In. Khua knŭk kna Phạm Minh Chính srăng nao hlăm klei bi trông jing sa hlăm dŭm ala čar mkŏ mjing P4G. Bruă ngă yuôm bhăn hĭn hlăm klei bi kƀĭn jing klei bi trông gưl dlông ti mmăt hruê 31/05/2021(tui hluê mmông Việt Nam) hŏng klei nao hgŭm mơ̆ng khua gĭt gai dhar bruă Châu âu, Việt Nam, Hà Lan, Kê-ni-a, Cốt-xơ-ta Ri-ca, Pê-ru, Áo, Thái Lan, Cam-pu-chia, pô bi ala kơ bruă klei mlih yan adiê mơ̆ng khua mil čhil Mi lehanăn khua kiă kriê keh prăk tar rŏng lăn (IMF). Hlăm klei kƀĭn, dŭm čô khua gĭt gai kñăm bi trông kơ 3 mta boh klei yuôm bhăn hlăm wưng ară anei. Anăn jing klei đĭ kyar mtah leh klei ruă tưp Covid-19, klei gĭr tar rŏng lăn hlăm bruă bi kna hnơ̆ng Carbon truh kơ thŭn 2050 lehanăn mđĭ kyar bruă ngă kyua yan adiê, krŭ wĭt klei găl bruă bi mguôp jih bruă mbĭt - bruă hjăn, blŭ hlăm anôk kƀĭn, khua knŭk kna Phạm Minh Chính mñă klă, kyua mâo klei ruă tưp lehanăn dŭm klei dleh dlan, klei lông dlăng čiăng kơ drei ƀuh klă hĭn klei yuôm bhăn mơ̆ng bruă răng mgang wăl hdĭp mda. Khua knŭk kna mtă, êpul êya yang ƀuôn tar rŏng lăn čiăng mâo klei sa ai mgaih msir mâo klei bi knar dŭm bruă mjêč hlăm bruă duh mkra hŏng klei čiăng mđĭ kyar mtah lehanăn đĭ kyar kjăp hĭn leh găn klei ruă tưp Covid-19.