VOV4.Êđê - Keh prăk vaccine gang mkhư̆ klei ruă tưp Covid-19 klă klơ̆ng dưi ba mdah hŏng klei kñăm iêu mthưr kơ jih jang mnuih ƀuôn sang hrăm mbĭt hŏng knŭk kna čiăng dưi mâo vaccine hnưm. Blŭ hlăm knăm anăn, khua knŭk kna Phạm Minh Chính lač klă “Anei jing keh dŭm bruă klei khăp, ai tiê bi mguôp, klei đăo knang, klei bi mguôp hrăm mbĭt čiăng dưi găn jih dŭm klei dleh dlan, đru srăng mâo klei dưi hŏng klei ruă ti ala čar Việt Nam”. Tui hluê ênoh mnuih čiăng blei lehanăn tlŏ mgang kơ 75 êklăk čô mnuih, ala čar Việt Nam čiăng kơ 150 êklăk hnơ̆ng vaccine, hŏng ênoh prăk 25 êbâo êklai prăk. kyuanăn, čiăng dưi mâo djăp prăk blei vaccine lehanăn tlŏ mgang kơ mnuih ƀuôn sang.

Bruă mkŏ mjing keh prăk vaccine gang mkhư̆ klei ruă tưp Covid-19 čiăng iêu mthưr kơ mnuih ƀuôn sang, lĭng kahan hlăm ala čar, mnuih Việt Nam dôk ti ala čar tač êngao, dŭm knơ̆ng bruă, pô mă bruă mnia blei, dŭm êpul êya hlăm ala čar lehanăn êngao ala čar bi mguôp, bi đru kơ keh prăk vaccine gang mkhư̆ klei ruă tưp Covid-19 hŏng ai tiê lehanăn bruă klam kyua klei suaih prăl mnuih ƀuôn sang, yang ƀuôn, ala čar lehanăn djuê ana. Hŏng klei bi mguôp tar rŏng lăn, hrăm mbĭt bi hrŏ klei ruă tưp Covid-19.