VOV4.Êđê- Hruê mbrue, ti sang bruă knŭk kna, khua knŭk kna Phạm Minh Chính tŭ drông leh k’iăng khua mil čhil Mi Kamala Harris, hlăk dôk čuă čhưn ala čar Việt Nam. Hlăm klei bi tuôm anăn, bi trông kơ hdră êlan kñăm mtrŭt mđĭ klei bi mguôp 2 ala čar, khua knŭk kna Phạm Minh Chính mñă ktang kơ bruă Việt Nam dlăng yuôm bhăn bruă duh mkra - mnia mblei jing kmeh gơ̆ng lehanăn boh kdrŭt hlăm klei mjĕ giăm Việt Nam - Mi. Mñă kơ 2 tĭng lŏ mđĭ hĭn klei bi mguôp hlăm klei kuôl kă bi mguôp bruă mnia mblei lehanăn duh bi liê (TIFA), mbĭt anăn lŏ ksiêm dlăng lehanăn mkŏ mjing klei bi mguôp hlăm bruă duh mkra - mnia mblei mrâo čiăng mtrŭt mđĭ hĭn klei mnia mblei hơĭt lehanăn kjăp ktang. Hmư̆ klei blŭ mơ̆ng khua knŭk kna Phạm Minh Chính, k’iăng khua mil čhil Mi Kamala Harris yap yuôm bhăn dŭm klei gĭr mơ̆ng ala čar Việt Nam hlăm bruă gang mkhư̆ klei ruă tưp Covid-19, mñă klă, ala čar Mi srăng lŏ đru kơ ala čar Việt Nam mdrơ̆ng mâo boh tŭ dưn hŏng klei ruă tưp Covid-19 lehanăn dŭm klei hyưt mơ̆ng klei ruă tưp ti mgi dih, rơ̆ng amâo brei tloh ôh dŭm klei bi đru tar rŏng lăn. K’iăng khua mil čhil Mi hâo hưn srăng lŏ đru 1 êklăk hnơ̆ng vaccine Pfizer lehanăn ba truh kơ ala čar Việt Nam hlăm 24 mmông kơ anăp.

Pô mblang: Y-Ƀel Êban