VOV4.Êđê- Hruê bi êdah keh prăk vaccine gang mkhư̆ klei ruă tưp Covid-19 srăng dưi mkŏ mjing hlăm mmăt knăm 6 hruê 5/6/2021 ti Hà Nội. Khua knŭk kna Phạm Minh Chính srăng hrăm mbĭt hŏng Mặt trận čar kwar Việt Nan, dŭm phŭn, dhar bruă, êpul bruă kđi čar - yang ƀuôn, pô bi ala kơ mnuih ƀuôn sang lehanăn pô bi ala dŭm knơ̆ng bruă srăng nao hgŭm hlăm bruă ngă yuôm bhăn lehanăn tŭ dưn anei.

Boh phŭn mkŏ mjing klei anei čiăng iêu mthưr kơ mnuih ƀuôn sang, lĭng kahan, mnuih Việt Nam ti ala čar tač êngao, dŭm knơ̆ng bruă, pô mnia blei, grăp êpul êya hlăm ala čar lehanăn êngao ala čar srăng bi mkrum, bi mguôp, bi đru kơ keh prăk vaccine gang mkhư̆ klei ruă tưp Covid-19 anei hŏng ai tiê lehanăn bruă klam kyua klei suaih prăk kơ jih jang mnuih, kơ yang ƀuôn, ala čar, djuê ana lehanăn hŏng klei bi mguôp tar rŏng lăn, hrăm mbĭt bi hrŏ klei ruă tưp hlăm grăp ala čar lehanăn tar rŏng lăn. Mĭn tĭng, ala čar Việt Nam čiăng blei 150 êklăk hnơ̆ng vaccine gang mkhư̆ klei ruă tưp Covid-19 lehanăn tlŏ mgang kơ hlăm brô 75 êklăk čô mnuih ƀuôn sang, hŏng ênoh prăk hlăm brô 25 êbâo 200 êklai prăk.

Pô mblang: Y-Ƀel Êban