VOV4.Êđê- Tlam mbrue (6/9), ti anôk bruă Khua lăn čar, Khua lăn čar Nguyễn Xuân Phúc drông leh khua bi ala knŭk kna ala čar India ti Việt Nam Pranay Verma. Khua lăn čar mâo klei lač jăk kơ knŭk kna India đru leh kơ Việt Nam masin mjing osi lehanăn djăp mta kdrăp mdrao mgŭn. Khua lăn čar čang hmăng kơ Khua bi ala mtrŭt knŭk kna India brei Việt Nam čan truh 10 êklăk vaccine hlăm wưng kơ anăp, lehanăn mkăp êa drao mdrao klei ruă Covid 19 lehanăn jih jang mnơ̆ng mnuă yua hlăm bruă mdrao mgŭn kơ Việt Nam. Hlăm wưng kơ anăp, Khua lăn čar Nguyễn Xuân Phúc akâo kơ Khua bi ala mtrŭt bruă hgŭm dua ala čar. Hlăm anăn mâo klei bi guôm gưl dlông, dŭm gưl lehanăn klei bi mjĕ êrô phung ƀuôn sang, mđĭ hĭn klei hgŭm hlăm djăp bruă msĕ si Dhar bruă hgŭm Việt Nam –India kơ klei duh mkra mnia mblei, klei kreh knhâo; hgŭm hlăm bruă kđi čar hlăm klei bi kƀĭn online amâodah klă anăp. Dua nah lŏ hgŭm mkŏ mjing dŭm bruă yuôm bhăn pioh bi hdơr 50 thŭn hrue mkŏ mjing klei mjĕ mgiăm, jih ai tiê mtrŭt bruă hgŭm truh kơ klei kluôm ênŭm wưng thŭn 2021 –2023, kñăm bi kjăp djăp mta klei hgŭm dua nah bi tŭ ư leh./.

Pô mblang: Y-Khem Niê