VOV4.Êđê - Hruê 30-5, Khua lăn čar Nguyễn Xuân Phúc mâo leh hră mơĭt kơ Khua mil čhil Mi Joe Biden bi trông kơ klei bi hgŭm dua ala čar, boh nik mđĭ hĭn klei bi hgŭm hlăm hdră   mdrơ̆ng hŏng klei ruă tưp Covid-19. Hlăm hră, Khua lăn čar bi mni kơ Mi jing ala čả đru mguôp prŏng leh ƀưan rŏng đru 4 êklai USD kơ klei mĭn mbruă kluôm rŏng lăn dưi ba yua Vaccine Covid-19 (COVAX) leh anăn hưn mthâo hŏng Khua mil čhil Joe Biden Việt Nam mâo mă leh 2 gưl vaccin hŏng 2,5 êklăk hnơ̆ng mơ̆ng klei mĭn mbruă anei.

Khua lăn čar Nguyễn Xuân Phúc čang hmăng Mi lŏ dơ̆ng đru Việt Nam leh anăn dŭm ala čar kơ phŭn mkăp vaccin, mbĭt anăn mtă dua tĭng hyuă kjăp klei bi hgŭm ksiêm hriăm, mkra mjing leh anăn ba yua vaccin gang mkhư̆ Covid-19. Khua lăn čar bi mklă, Việt Nam dlăng myuôm klei bi hgŭm kluôm hŏng Mi leh anăn đaŏ knang hlăm ai tiê bi hgŭm, dua ala čar srăng lŏ dơ̆ng mâo klei bi hgŭm êlam hĭn, boh sĭt, ba klei tŭ dưn kơ mnuih ƀuôn sang dua ala čar, đru mguôp hlăm brưa mđĭ lar klei êđăp ênang, hơĭt kjăp, bi hgŭm leh anăn mđĭ kyar ti krĭng wăl leh anăn dlông rŏng lăn./.

H Zawut pô mblang