VOV4.Êđê-  Hruê 2/6, Khua lăn čar Nguyễn Xuân Phúc mâo leh hră ba m’ĭt kơ Khua mil čhil Liên bang Nga Vladimir Putin kñăm bi trông kơ klei bi mjĕ dua nah, hlăm anăn mâo bruă mđĭ hĭn hdră bi hgŭm mdrơ̆ng hŏng klei ruă Covid 19. Hlăm hră m’ĭt, Khua lăn čar mñă klă, VIệt Nam bi myuôm klei bi mjĕ mâo mơ̆ng đưm jăk siam lehanăn ƀĭng hgŭm bruă kluôm dhuôm Việt Nam – Nga, čang hmăng klei bi mjĕ dua ala čar ƀrư̆ hruê ƀrư̆ êlam hĭn lehanăn tŭ dưn hĭn, mbĭt anăn bi êdah klei m’ak hlăk klei bi mjĕ dua ala čar lŏ dơ̆ng đĭ kyar jăk siam hlăm djăp mta ra bruă amâo uêñ klei hmăi mơ̆ng klei ruă tưp. Lač jăk kơ Khua mil čhil Vladimir Putin lehanăn Liên bang Nga mdup brei leh kơ VIệt Nam 1000 hnơ̆ng vaccine lehanăn lu mnơ̆ng yua hlăm bruă mdrao mgŭn kñăm gang mkhư̆ klei ruă tưp, Khua lăn čar Nguyễn Xuân Phúc čang hmăng Nga lŏ đru, mjing klei găl čiăng kơ Việt Nam hnưm dưi ba yua vaccine mơ̆ng Nga, ăt msĕ mơh bi hgŭm hlăm bruă mkra mjing vaccine ti Việt Nam./.

                                                    Pô mblang: H’Nêč Êñuôl