VOV4.Êđê - Tlam hruê 28-7, hruê mă bruă knhal tuič hlăm klei bi kƀĭn tal 1, Bruă kƀĭn ala bi mklă Hdră mtrŭn čuăn ruah mnuih mă ruă Knŭk kna wưng bruă kƀĭn ala gưl XV, mâo 27 čô: Khua knŭk kna, 4 K’iăng Khua knŭk kna, 18 čô Khua phŭn bruă leh anăn 4 Khua anôk bruă bi knar hŏng Phŭn bruă. Tlam 28-7, Khua lăn čar Nguyễn Xuân Phúc bi mklă ruah mdưm phung hlăm Knŭk kna.

Blŭ hlăm ti anôk bi kƀĭn, bi ala kơ khua gĭt gai Đảng, Knŭk kna hơêč hmưi Khua knŭk kna Phạm Minh Chính, phung K’iăng Khua Knŭk kna, phung Khua phŭn bruă leh anăn khua anôk bruă bi knar, Khua lăn čar Nguyễn Xuân Phúc lač, mơ̆ng wưng bi leh anăn Phung khua gĭt gai Knŭk kna truh ară anei, khă gơ̆ wưng amâo lu ôh ƀiădah êpul mă bruă Knŭk kna kyua Khua Knŭk kna Phạm Minh Chính ngă khua hmao pŏk ngă ktang phĭt, mđrăm mbĭt dŭm hdră msir gĭt gai, lŏ dơ̆ng bi êdah sa êpul mă bruă pral kdal, jih ai tiê ngă bruă.

H Zawut pô mblang