VOV4.Êđê- Tlam mbruê 15/7, ti adŭ bruă khua lăn čar, khua lăn čar Nguyễn Xuân Phúc mâo leh klei bi tuôm hŏng khua kiă kriê êpul hgŭm mnuih ƀuôn sang mơ̆ng Hàn Quốc dôk ti ala čar Việt Nam lehanăn dŭm êpul group prŏng mơ̆ng Hàn Quốc. Hlăm klei bi tuôm anăn, bi ala kơ knŭk kna Việt Nam, khua lăn čar Nguyễn Xuân Phúc mni kơ dŭm knơ̆ng bruă mơ̆ng Hàn Quốc ti ala čar Việt Nam amâo lui ôh klei ruă tưp Covid-19 tưp lar hlăm dŭm sang măi, anôk mkra mjing, rơ̆ng ngă bruă mkra mjing čiăng mâo ênŭm mnơ̆ng yua. Boh nĭk, dŭm knơ̆ng bruă Hàn Quốc đru leh dŭm êklăk dolar kơ bruă gang mkhư̆ klei ruă tưp Covid-19 lehanăn đru hlăm keh prăk vaccine gang mkhư̆ klei ruă tưp Covid-19 kơ ala čar Việt Nam. Khua lăn čar Nguyễn Xuân Phúc mñă klă, Việt Nam ƀuăn rơ̆ng srăng mjing klei găl brei mâo anôk ngă bruă êđăp ênang kơ dŭm knơ̆ng bruă mơ̆ng Hàn Quốc, čiăng kơ dŭm knơ̆ng bruă lehanăn pô duh bi liê mơ̆ng Hàn Quốc dưi đĭ kyar hlăm dŭm anôk duh mkra mnia mblei Asi lehanăn tar rŏng lăn.

Pô mblang: Y-Ƀel Êban