VOV4.Êđê - Hrue mbrue (30/7), ti ƀuôn prŏng Hồ Chí Minh, Khua lăn čar Nguyễn Xuân Phúc mă leh bruă hŏng phung khua kiă kriê ƀuôn prŏng Hồ Chí Minh. Khua lăn čar mñă mta kñăm êlâo hĭn lehanăn yuôm bhăn hĭn jing răng mgang klei suaih pral lehanăn klei êđăp ênang kơ phung ƀuôn sang, bi hrŏ ênoh mnuih djiê. Hlue anăn bruă čuăn phŭn jing hlue ngă bi kjăp hdră mtrŭn mrô 16, lehanăn čiăng dưi ngă bruă anei hŏng klei jăk, snăn brei mđing hĭn mơh kơ phung ƀuôn sang amâo mâo lui phung ƀuôn sang lĕ hlăm klei ư̆ êpa ôh. Hŏng ƀuôn prŏng mâo êbeh 10 êklăk čô mnuih anei, bruă mdrơ̆ng hŏng klei ruă tưp jing sa mta bruă dleh dlan êdi, khua lăn čar bi mni kơ klei gĭr mơ̆ng phung khua kiă kriê ƀuôn prŏng, jih bruă kđi čar mâo leh dŭm hdră êlan kjăp mdrơ̆ng hŏng klei ruă tưp, hmao mâo dŭm hdră êlan đru ba kơ yang ƀuôn, pral mkŏ mjing truh 16 boh sang êa drao jing jai hŏng ênoh prŏng, mâo giăm 50 êbâo boh jhưng. Ti anôk mă bruă, Khua lăn čar brei thâo mâo mtrŭt mjhar leh phung bi đru hlăm ala car lehanăn mơ̆ng ala tač êngao đru kơ ƀuôn prŏng Hồ Chí Minh 103 êklai prăk lehanăn 10 boh masin bi êwa, mbĭt hŏng lu kdrăp mdrao mgŭn mkăn. Hlăm anăn, knơ̆ng prăk đru truh 50 êklai prăk, knơ̆ng prăk Sacombank đru kơ 30 êklai prăk, phung duh mkra ala tač êngao bi mguôp 1 êklăk dolar./.

Y Khem pô mblang