VOV4.Êđê- Tlam hruê 3-6, ti Anôk bruă Khua lăn čar, Khua lăn čar Nguyễn Xuân Phúc drông leh Khua bi ala Nhật Bản ti Việt Nam Yamada Takio hriê kkuh čhưn leh anăn bi trông kơ klei bi hgŭm hdră bruă êlam Việt Nam - Nhật Bản. Khua lăn čar Nguyễn Xuân Phúc bi êdah klei hơ̆k mơak klei bi hgŭm kluôm Việt Nam - Nhật Bản hlăm wưng êgao lŏ dơ̆ng đĭ kyar jăk hlăm dŭm mta bruă; mtă kơ Khua bi ala Nhật Bản lŏ dơ̆ng mđĭ klei mjĕ gưl dlông leh anăn dŭm gưl plah wah dua ala čar, klei bi hgŭm, bi đru hlăm hdră gang mkhư̆ klei ruă Covid-19, mđĭ ktang klei bi hgŭm bruă duh mkra, mtrŭt mjhar, mđĭ anôk bruă mnia blei Nhật Bản lŏ dơ̆ng pŏk mlar klei duh bi liê, mnia blei ti Việt Nam.  Bi mni kơ Khua lăn čar Nguyễn Xuân Phúc pioh mmông drông, Khua bi ala Yamada Takio bi êdah klei čăng hmăng Khua lăn čar nao čhưn gưl knŭk kna ti Nhật Bản hlăm wưng păn bruă ti Việt Nam. Khua bi ala bi mklă hdră sa anăn mơ̆ng Knŭk kna Nhật Bản dlăng myuôm klei bi hgŭm hŏng Việt Nam, lŏ dơ̆ng gĭr đru kơ Việt Nam gang mkhư̆ klei ruă Covid-19, mđĭ klei bi hdŭm mđĭ kyar anôk bruă nah gŭ, bi mlih mrô, wăl hdĭp mda, anôk bruă mnia blei Nhật Bản duh bi liê hlăm Việt Nam.

Pô mblang: H’Zawut Ƀuôn Yă