VOV4.Êđê- Tlam mbrue (12/8), ti anôk bruă khua lăn čar, Khua lăn čar Nguyễn Xuân Phúc drông leh Kamal Malhotra, pô đru bruă mơ̆ng Êpul hgŭm lu ala čar ti Việt Nam, hriê kkuh čhưn êlâo kơ mjưh ruĕ wưng păn bruă. Khua lăn čar hơêč hmưi kơ ñu bi leh jăk bruă ti Việt Nam, khua lăn čar lač Việt Nam mpŭ kơ klei bi đru, klei sa ai, klei hgŭm yuôm bhăn mơ̆ng Êpul hgŭm lu ala čar hŏng Việt Nam hlăm dăl 40 thŭn êgao, lehanăn mơak ƀuh klei bi mguôp plah wah dua nah knư̆ hrue knư̆ mâo klei đĭ kyar. Khua lăn čar Nguyễn Xuân Phúc čang hmăng hlăm wưng kơ anăp Êpul hgŭm blu ala čar lŏ dơ̆ng mâo dŭm klei kăp kčĕ pral, lehanăn mâo klei đru kơ ngăn prăk, lehanăn hdră mnêč kơ Việt Nam, hlăm anăn mđing đru kơ Việt Nam bi mlih hdră mđĭ kyar hlue hŏng hdră dưn yua jăk hĭn kơ klei bi mlih ênuk mđĭ kyar 4.0, kjăp hĭn, klă kluôm hĭn, amâo mâo lui mnuih mkăn kơ tluôn ôh, djŏ guôp hŏng hdră êlan mơ̆ng tar rŏng lăn, anăp dưi bi sĭt klei êpa mhao hlăm klei mđĭ kyar lăn čar ti si Klei bi kƀĭn prŏng Đảng 13 mtrŭn leh./.

Pô mblang: Y-Khem Niê