VOV4.Êđê- Hruê mbruê 9/6, ti sang bruă khua lăn čar, khua lăn čar Nguyễn Xuân Phúc, khua êpul gĭt gai mlih mrâo klei bhiăn gưl dlông, khua êpul mkŏ mjing “Hdră êlan mkŏ mjing lehanăn bi kluôm ênŭm ala čar Việt Nam yang ƀuôn ngă phŭn êngiê truh thŭn 2030” tă hdră truh thŭn 2045, mâo leh klei bi kƀĭn hŏng dŭm anôk bruă djŏ tuôm kơ hdră êlan anei.

Blŭ hlăm klei kƀĭn anăn, khua lăn čar Nguyễn Xuân Phúc lač klă, bruă mprăp kơ “Hdră êlan mkŏ mjing lehanăn bi kluôm ênŭm ala čar Việt Nam yang ƀuôn ngă phŭn êngiê truh thŭn 2030” tă hdră truh thŭn 2045, jing bruă klam yuôm bhăn hlăm hdră mtrŭn mơ̆ng klei kƀĭn bruă Đảng tal 13 bi êdah. Bruă mkŏ mjing dŭm boh phŭn mơ̆ng hdră êlan čiăng mâo dŭm hdră êlan kreh knhâo, mâo klei thâo ƀuh kbưi truh ti thŭn 2045, mlih mrâo lehanăn bi djŏ hŏng klei đĭ kyar tui si klei ksiêm duah ênuk mrâo hlăm ala čar lehanăn ala čar tač êngao. Khua lăn čar Nguyễn Xuân Phúc ăt mta kơ êpul bruă gưl dlông hlăm ala čar srăng lŏ mbŏ dŭm hdră êlan yuôm hĭn lehanăn djŏ hŏng hră êlan anei.

Pô mblang: Y-Ƀel Êban