VOV4.Êđê- Tlam hruê 1/7, ti Anôk bruă khua lăn čar, Khua lăn čar Nguyễn Xuân Phúc, Khua anôk bruă gĭt gai mkŏ mjing Hdră bruă anei mâo leh mmông mă bruă hŏng lu phung nai prŏng, nai prĭn, phung thơ̆ng kơ bruă hlăm hdră kreh knhâo, bruă hdră bhiăn čiăng hmư̆ klei đru mguôp hlăm Hdră êlan mkŏ mjing lehanăn bi leh hdră bruă knŭk kna yang ƀuôn ngă phŭn êngiê. Blŭ hrăm ti anôk mă bruă, Khua lăn čar Nguyễn Xuân Phúc mñă klă, Hdră bruă anei jing “Mngăt êwa” hlăm bruă mkra mlih hdră bhiăn, lŏ dơ̆ng mkŏ mjing knŭk kna yang ƀuôn ngă phŭn êngiê Việt Nam. Hluê hŏng ai tiê anăn, Khua lăn čar mtă kơ phung thơ̆ng kơ bruă, phung mă bruă kreh knhâo đru mguôp hlăm dŭm mta bruă msĕ si: Hnơ̆ng ngă bruă, hdră ngă bruă, hdră êlan hluê ngă Hdră bruă, kơ mta phŭn ksiêm dlăng, dŭm bruă phŭn mơ̆ng hdră bruă, bruă kah mbha dŭm anôk bruă hluê ngă dŭm mta bruă... lehanăn dŭm bruă mkăn mâo phung thơ̆ng kơ bruă, phung kreh knhâo čang hmăng đru mguôp klei blŭ. Khua lăn čar mñă, dŭm klei blŭ đru mguôp ti anôk mă bruă tal anei srăng dưi tŭ mă djăp eneŭm hlăm bruă ngă bi leh Hdră kčah mkŏ mjing Hdră bruă. Anôk gĭt gai srăng mă klei blŭ đru mguôp mơ̆ng phung thơ̆ng kơ bruă, phung mă bruă kreh knhâo, pŏk dŭm klei bi kƀĭn trông hlăm dŭm mta bruă mkăn čiăng tŭ mă klei blŭ đru mguôp kơ Hdră bruă./.

Pô mblang: H’Nêč Êñuôl