VOV4.Êđê - Ƀri bi hdơr 60 thŭn hruê knhuah gru sang hră khua kahan, kahan hang 2 (27/8/1961 – 27/8/2021), khua lăn čar Nguyễn Xuân Phúc mâo leh hră hơêč hmưi kơ jih jang phung knuă druh, khua kahan, nai mtô, hđeh hriăm, lĭng kahan hlăm sang hră. Bi ala kơ êpul gĭt gai Đảng, knŭk kna lehanăn knơ̆ng bruă lĭng kahan gưl dlông, khua lăn čar Nguyễn Xuân Phúc mơĭt leh klei hơêč hmưi kơ dŭm gưl khua lĭng kahan, knuă duh, nai mtô, hđeh hriăm, mnuih mă bruă lehanăn lĭng kahan hlăm sang hră dŭm klei khăp siam lehanăn klei bi mni jăk hĭn. Mkŏ mjing hlăm wưng krĭng kwar dhŭng dôk bi blah bi kdơ̆ng hŏng Mi, đru dŏng ala čar, găn 60 thŭn mkŏ mjing lehanăn mtô mjuăt, bi blah lehanăn hriê kơ prŏng, dŭm gưl knuă druh, khua kahan mâo klei mtô mjuăt mơ̆ng sang hră nao hgŭm leh hlăm dŭm klei bi blah grăp kdrăn mblah, đru sa klei yuôm bhăn hlăm klei dưi mơ̆ng lĭng kahan lehanăn mnuih ƀuôn sang krŭ wĭt klei êngiê krĭng kwar dhŭng, hluh hlir ala čar lehanăn wưng rŭ mdơ̆ng ala čar, rang mgang ala čar ară anei. Truh kơ ară anei, sang hră anei dưi jing anôk mtô mjuăt khua kahan gĭt gai kahan hang hnơ̆ng hriăm gưl prŏng, leh kơ sang hră gưl prŏng lehanăn ksiêm duah klei kreh knhâo bruă lĭng kahan ala čar drei.

Khua lăn čar mâo klei đăo knang hlăm hruê mmông kơ anăp, sang hră srăng lŏ mâo klei gĭr ktưn hĭn, amâo mdei mlih mrâo, mđĭ hnơ̆ng tŭ dưn hlăm klei mtô mjuăt lehanăn ksiêm duah klei kreh knhâo, bi leh bruă klam dưi jao, đru mguôp hlăm bruă mkŏ mjing lĭng kahan cách mạng, mâo klei hriăm, thâo lehanăn mrâo mrang.

Y Ƀel pô mblang