VOV4.Êđê- Hruê mbruê 7/6, khua lăn čar Nguyễn Xuân Phúc, khua êpul mlih mrâo klei bhiăn gưl dlông mâo leh klei mă bruă hŏng êpul khua bruă Đảng sang phat kđi yang ƀuôn gưl dlông kơ klei bi trông “Mlih mrâo êpul phung mă bruă sang phat kđi yang ƀuôn gưl dlông ngă bruă tŭ dưn tui si hdră mtrŭn gưl dlông 6 gưl 12 mơ̆ng Đảng lehanăn dưi djŏ hŏng ênuk mrâo”. Leh dŭm phŭn, dhar bruă mâo boh blŭ, bi mklă hruê mă bruă, khua lăn čar Nguyễn Xuân Phúc mñă klă boh tŭ dưn dưi bi êdah hlăm hdră mtrŭn mrô 49 mơ̆ng phŭn bruă kđi čar jing bi kluôm ênŭm êpul mă bruă, êpul mă bruă dŭm anôk bruă klei bhiăn, hlăm anăn kñăm kơ bruă mkŏ mjing, bi kluôm ênŭm êpul mă bruă lehanăn bruă ngă mơ̆ng sang phat kđi yang ƀuôn gưl dlông.

Khua lăn čar lač klă. Bruă lŏ mkŏ mjing dŭm boh sang phat kđi alŭ wăl mâo boh tŭ dưn yuôm bhăn, anei ăt jing bruă lŏ dăp dŭm hdră êlan bi mlih klei bhiăn mrâo wưng thŭn 2021-2030, tă hdră truh ti thŭn 2045 tui si hră mtrŭn mrô 49 mơ̆ng phŭng bruă kđi čar. Boh nik sang phat kđi alŭ wăl srăng mâo klei ksiêm dlăng mơ̆ng êpul gơ̆ng bruă ƀuôn sang, bruă kƀĭn ala, mặt trận čar kwar Việt Nam, boh nik jing mnuih ƀuôn sang hŏng dŭm anôk bruă phat kđi.

Pô mblang: Y-Ƀel Êban