VOV4.Êđê- Aguah mbruê (18/8), Khua lăn car Nguyễn Xuân Phúc kiă kriê leh mmông mă bruă hŏng phung khua kiă kriê knơ̆ng čar Bắc Giang kơ bruă čuăn duh mkra – ala ƀuôn. Blŭ hrăm ti anôk mă bruă, Khua lăn čar bi myuôm bruă Đảng, čar, bruă sang čư̆ êa čar Bắc Giang ngă leh hŏng lu hdră mdrơ̆ng hŏng klei ruă tưp, mâo ba wĭt leh klei tŭ dưn. Kyuanăn, leh êbeh 2 mlan mdrơ̆ng hŏng klei ruă tưp tŭ jing, 36 hrue êgao Bắc Giang amâo lŏ mâo ôh mnuih mâo klei ruă mrâo. Ai êwa krŭ wĭt kơ bruă duh mkra hlăk mjhĭt m’uăt.

Anei jing boh tŭ dưn yuôm bhăn, đru mguôp kơ klei tŭ jing hlăm kluôm ala, lehanăn mă klei hriăm jăk kơ dŭm alŭ wăl mkăn hlăm kluôm ala. Msĕ si, čar mâo gang mkhư̆ leh jăk klei ruă tưp ñŭ kma hlăm 4 alŭ wăl duh mkra prŏng. Êjai dôk găn klei ruă tưp čar Bắc Giang ăt bi leh mơh bruă ruah khua pô bi ala bruă kƀĭn ala, lehanăn pô bi ala Êpul gơ̆ng bruă ƀuôn sang dŭm gưl. Mbĭt hŏng anăn, čar mâo leh boh tŭ dưn jăk kơ klei duh mkra mnia mblei hŏng ala tč êngao, prăk hrui wĭt kơ knŭk kna. Ƀri wưng anei, bi ala kơ Êpul khua kiă kriê Đảng, Lăn čar, Khua lăn čar Nguyễn Xuân Phúc mđup brei leh Medai mă bruă mrô 3 kơ bruă Đảng čar, bruă sang čư̆ êa lehanăn phung ƀuôn sang čar Bắc Giang kơ dŭm boh tŭ dưn yuôm bhăn hlăm bruă mdrơ̆ng hŏng klei ruă tưp Covid 19./.

Pô mblang: Y-Khem Niê