VOV4.Êđê - Khua lăn čar Nguyễn Xuân Phúc mâo leh hră m’ĭt kơ Khua knŭk kna Nhật Bản Suga Yoshihide h’êč hmưi kơ Hdră bi lông mjuăt ktang asei mlei Olympic lehanăn Paralympic Tokyo 2020 mphŭn pŏk hlăm mmăt hruê 23 mlan 7. Hlăm hră m’ĭt, Khua lăn čar bi êdah klei hơ̆k m’ak hŏng Khua knŭk kna, Nhật Bản, jing ƀĭng găp sĭt suôr mơ̆ng mnuih ƀuôn sang Việt Nam, ba m’ĭt klei khăp lehanăn klei h’êč hmưi jăk siam hĭn truh kơ Hdră bi lông mjuăt ktang asei mlei Olympic lehanăn Paralympic Tokyo 2020 – jing sa hdră mjuăt asei mlei prŏng mâo klei čang guôn lehanăn tui ksiêm êdi ti Việt Nam lehanăn tar rŏng lăn. Khua lăn čar Nguyễn Xuân Phúc h’êč hmưi kơ Hdră bi lông mjuăt ktang asei mlei Olympic lehanăn Paralympic Tokyo 2020 tŭ jing jăk siam. Pui kƀŏng Olympic trơ̆ng mngač bhung ti Tokyo jing sa klei mtrŭt mđĭ ai prŏng hŏng mnuih khăp mjuăt asei mlei, bi êdah klei jhŏng, ai ktang mơ̆ng anak mnuih drei ti anăp wưng dôk bluh mâo klei ruă tưp hlăm tar rŏng lăn mbĭt anăn anei ăt jing klei bi êdah kơ klei mĭn lehanăn ai tiê jhŏng ktang mơ̆ng Nhật Bản – sa djuê ana jhŏng ktang, sa ala čar đĭ kyar hlăm tar rŏng lăn lehanăn ăt jing ƀĭng hgŭm kluôm dhuôm mơ̆ng Việt Nam./.

HNêc pô mblang