VOV4.Êđê- Ƀri gưl Klei bi kƀĭn tal sa Êpul hgŭm Mphŭn čô̆ kơ bruă ala čar (VINEN), Khua lăn čar Nguyễn Xuân Phúc mơĭt hră hơêč hmưi kơ Klei bi kƀĭn tal sa Êpul hgŭm mphŭn čô̆ kơ bruă ala čar. Khua lăn čar Nguyễn Xuân Phuc lač, mđĭ mphŭn čô̆ kơ bruă jing sa hlăm dŭm klei tŭ yuôm bhăn hĭn hlăm klei mlih mrâo bruă duh mkra ti Việt Nam. Khua lăn čar brei thâo, 5 thŭn êlaoa, mphŭn pŏk wưng thŭn 2016-2021, Knŭk kna bi mklă thŭn 2016 jing thŭn Ala čar Mphŭn čô̆ kơ bruă.  Mơ̆ng anăn, ai tiê mphŭn čô̆ kơ bruă dưi lar bra, wăl duh bi liê mnia blei dưi mkra mlih, êbeh 100 êbâo anôk bruă mnia blei dưi mkŏ mjing mrâo grăp thŭn leh anăn truh ară anei lăn čar drei mâo êbeh 800 êbâo  anôk bruă mnia blei dôk ngă bruă. Khua lăn čar čang hmăng Êpul hgŭm mphŭn čô̆ kơ bruă ala čar srăng klă sĭt jing kban mkŏ klei tŭ dưn êpul êya mphŭn čô̆ kơ bruă, đru mđĭ ai, đru, hluê ngă klei čang hmăng mphŭn čô̆ kơ bruă ti Việt Nam.

Pô mblang: H’Zawut Ƀuôn Yă