VOV4.Êđê- Ƀri klei bi kƀĭn prŏng gưl tal sa Êpul hgŭm klei krŭ kơ bruă ala čar (25/8), Khua lăn čar Nguyễn Xuân Phúc mâo leh hră mơĭt kơ phung bi ala nao ti anôk bi kƀĭn. Hlăm hră mâo kdrêč čih “Hlăm bruă mđĭ kyar lăn čar, phung duh mkra, anôk duh mkra mâo bruă klăm yuôm bhăn snăk. Hrue 13/10 grăp thŭn mâo khua knŭk kna yap jing hrue phung duh mkra Việt Nam.

Đảng ăt mâo leh hdră mtrŭn kơ klei mđĭ kyar êpul phung duh mkra hlăm djăp mta bruă. Đảng, knŭk kna mâo nanao klei kiă kriê, klei đru lehanăn klei sa ai mbĭt hŏng phung ƀuôn sang, mjing djăp klei găl čiăng kơ phung ƀuôn sang dưn yua jih klei dưi, nga bruă hŏng klei thâo mĭn, mđĭ kyar bruă knuă, đru rŭ mdơ̆ng lăn čar”. Khua lăn čar čang hmăng Êpul hgŭm krŭ kơ bruă ala čar srăng jing kdrông bi mguôp êpul êya phung krŭ kơ bruă, mâo klei thâo bi đru mbĭt, bi mjut mjing, kñăm bi sĭt klei hmăng hmưi dưi rŭ mjing bruă knuă ti Việt Nam./.

Pô mblang: Y-Khem Niê