VOV4.Êđê-  Ƀri gưl Klei bi kƀĭn Êpul hgŭn bruă kƀĭn ala dŭm ala čar ASEAN tal 42 (AIPA 42) klă sĭt mphŭn pŏk hluê hdră online, bi ala kơ Knŭk kna leh anăn mnuih ƀuôn sang Việt Nam, Khua lăn čar Nguyễn Xuân Phúc mâo leh hră mơar kkuh drông mơĭt kơ Êpul hgŭm AIPA-42. Khua lăn čar mñă klă, Klei bi kƀĭn Êpul hgŭm AIPA-42 dưi mkŏ mjing hlăm boh klei dlông rŏng lăn leh anăn krĭng wăl dôk hmaĭ kjham kyua klei ruă Covid-19, hmaĭ kơ bruă duh mkra- ala ƀuôn leh anăn klei hdĭp mnuih ƀuôn sang ti dŭm ala čar.

Hlăm wưng dleh dlan, lông dlăng ară anei, Khua lăn čar mñă klă kơ hnơ̆ng yuôm bhăn mơ̆ng hdră čih mkra hdră bhiăn dŭm ala čar ASEAN, mơ̆ng AIPA leh anăn dŭm ala čar hgŭm msĕ si kmeh gơ̆ng bi hgŭm jăk leh anăn đru tŭ dưn kơ klei gĭr ktưn mơ̆ng dŭm knŭk kna mkra mđĭ ai ktang bi hgŭm mơ̆ng ASEAN hgao klei dleh dlan, lŏ dơ̆ng hluê ngă tŭ jing dŭm hdră kñăm mkŏ mjing êpul êya.

H Zawut pô mblang