VOV4.Êđê - Ƀri bi hdơr 80 thŭn hrue knhuah gru Mnuih khua thŭn Việt Nam (6/6/1941 – 6/6/2021), Khua lăn čar Nguyễn Xuân Phúc mâo leh hră mơĭt hơêč hmưi truh kơ jih jang mnuih khua thŭn Việt Nam. Hlăm hră čih, Khua lăn čar bi mni, hơêč hmưi dŭm boh tŭ dưn năng myưng m’ang mơ̆ng dŭm gưl puhng khua thŭn Việt nam mâo leh. Hơêč hmưi kơ Êpul hgŭm mnuih khua thŭn Việt Nam găn hlăm 80 thŭn êgao mâo bi leh jăk bruă čuăn hŏng lu bruă ngă yuôm bhăn, bruă bi ktưn tŭ jing. Khua lăn čar čang hmăng kơ mnuih khua thŭn Việt Nam hlăm ala čar, lehanăn ti ala tač êngao lŏ dơ̆ng bi mguôp jih ai tiê, klei mĭn, klei thâo pô bi rŭ mdơ̆ng lăn čar. Lehanăn mtă kơ Dhar bruă ala čar kơ mnuih khua thŭn Việt Nam, dŭm gưl bruă Đảng, bruă sang čư̆ êa, dŭm êpul bruă, êpul êya bruă yang ƀuôn, grăp gŏ sang duh mĭn rông ba dlăng kriê mnuih khua thŭn, pŏk mlar dŭm bruă ngă klă mngač hlăm klei dlăng kriê mnuih khua thŭn, mđĭ bi lar bruă phung khua thŭn đru mguôp, mtrŭt mđĭ bruă rŭ mdơ̆ng lăn čar mâo klei đĭ kyar pral lehanăn kjăp./.

Y Khem pô mblang