VOV4.Êđê -  Ƀri bi hdơr 80 thŭn Hruê mkŏ mjing Êpul bruă Đội Thiếu niên Tiền phong Hồ Chí Minh (15/5/1941-15/5/2021) lehanăn Hruê quốc tế phung hđeh êlăk, hruê 1/6, Khua lăn čar Nguyễn Xuân Phúc m’ĭt leh hdră h’êč hmưi, ba m’ĭt truh kơ anôk bruă Đội, phung hđeh êlăk, phung knuă druh klam bruă phung hđeh klei lač jăk lehanăn klei h’êč hmưi jăk siam hĭn. Hlăm hră m’ĭt, Khua lăn čar lač klă: Lŏ čuê lehanăn mđĭ lar knhuah gru kdrưh k’ăm, hruê anei, dŭm ênuk gưl phung hđeh hluê ngă kjăp asăp Awa mtă, thâo bi khăp čiăng, hgŭm mguôp, khăp mă bruă knuă, gĭr tui ksiêm, phung hđeh mă bruă điêt ƀiădah bŏ hŏng klei gĭr, klei čang hmăng kyua klei jăk siam êdei anăp mơ̆ng lăn čar. Bi ala phung khua kiă kriê Đảng, Knŭk kna, Khua lăn čar jih ai tiê bi mni kơ dŭm boh tŭ  kdlưn hĭn mơ̆ng phung hđeh êlăk, phung knuă druh mă bruă Đội; mbĭt anăn mtă kơ Êpul bruă Êdam êra Cộng sản Hồ Chí Minh lŏ dơ̆ng mlih mrâo mta klei, hdră ngă bruă, mtrŭt mjhar, mkŏ mjing êpul bruă Đội kjăp ktang, ngă jăk hdră răng mgang, kriê dlăng, mjuăt bi hriăm phung hđeh, dŭm gưl bruă Đảng, bruă sang čư̆ êa, dŭm anôk, dhar bruă, êpul êya mđing rơ̆ng kjăp bruă hluê ngă klei dưi lehanăn bruă klam mơ̆ng phung hđeh, đru kơ phung hđeh dưi đĭ prŏng kluôm dhuôm./.

H Nêč pô mblang