VOV4.Êđê - Tlam hruê 29/7, ti ƀuôn prŏng Hồ Chí Minh, Khua lăn čar Nguyễn Xuân Phúc nao čuă leh Anôk bruă Đảng, lehanăn mnuih ƀuôn sang ƀuôn prŏng Hồ Chí Minh dôk gĭr gang mkhư̆ klei ruă Covid 19, hlăm anăn mâo 2 kdriêk Hóc Môn lehanăn Củ Chi. Khua lăn čar ăt iêu mtrŭt phung đru dŏng đru kơ grăp kdriêk 5 êklai prăk, 5 kdrăp masin bi êwa. Mbĭt anăn lač tơdah amâo mâo ôh Asăp mtrŭn mrô 16 hlăm 2 hruê kăm êgao, ƀuôn prŏng Hồ Chí Minh srăng tŭ lu klei luič liê hĭn kyua klei ruă tưp ngă; Khua lăn čar mtă kơ mnuih ƀuôn sang ƀuôn prŏng lŏ dơ̆ng hluê ngă kjăp Asăp mtrŭn anei. Khua lăn čar mtă kơ ƀuôn prŏng mđĭ lar ai tiê bi mguôp, lŏ dơ̆ng mkŏ mjing dŭm êpul mdrơ̆ng hŏng klei ruă Covid 19 ti alŭ wăl nao grăp alŭ, grăp boh sang, ksiêm dlăng grăp čô mnuih, pral hmao ƀuh, tui duah, čuăl krĭng ti anôk mâo klei ruă. Ăt hlăm tlam hruê 29/7, ti ƀuôn prŏng Hồ Chí Minh, Khua lăn čar nao čhưn lehanăn mă leh bruă ti Anôk bruă mkra mjing êa drao Nanogen, êpul êya dôk lông ba yua vaccine nanocovax. Khua lăn čar mtă kơ Phŭn bruă mdrao mgŭn mjing klei găl hlăm bruă ngă hră m’ar kơ Anôk bruă lông ba yua vaccine wưng tal 3, ƀiădah ăt rơ̆ng kjăp djŏ hdră, kyua djŏ tuôm kơ klei suaih pral mnuih ƀuôn sang. Khua lăn čar ăt mtă kơ Anôk bruă Nanogen amâo mdei mkra mđĭ, bi leh hdră ngă bruă, mkra mjing vaccine mâo hnơ̆ng tŭ jăk, bi hrŏ tuič hnơ̆ng klei truh amâo jăk. Êngao kơ mkăp hlăm ala čar, brei tĭng kơ hdră kbưi hĭn jing ba čhĭ vaccine êngao ala čar./.

H Nêč pô mblang