VOV4.Êđê - Tŭ ư klei iêu jăk mơ̆ng khua gĭt gai Đảng, khua lăn čar Lào Thongloun Sisoulith, aguah anei, 9/8, khua lăn čar Nguyễn Xuân Phúc mbĭt hŏng mô̆ ñu ba anăp êpul ngă bruă gưl dlông mơ̆ng Hà Nội nao čuă čưn ala čar Lào mơ̆ng hruê anei truh kơ hruê 10/8. Anei jing klei nao čuă ala čar tač êngao tal êlâo hĭn mơ̆ng khua lăn čar Nguyễn Xuân Phúc leh păn bruă jing khua lăn čar, bi êdah klei dlăng yuôm bhăn mơ̆ng Đảng, knŭk kna Việt Nam hŏng klei mjĕ giăm, bi mguôp kluôm ênŭm Việt Nam - Lào.

Hlăm klei nao čuă, phung khua gĭt gai 2 ala čar srăng bi trông kơ bruă mtrŭt mđĭ klei mjĕ giăm bruă kđĭ čar, bruă hŏng tač êngao, boh nĭk hlăm wưng klei ruă tưp Covid-19, čiăng jing tur yuôm bhăn mtrŭt mđĭ klei bi mguôp 2 ala čar hlăm dŭm bruă msĕ si mnia mblei, duh bi liê, bruă lĭng kahan, klei êđăp ênang, dhar kreh, mtô mjuăt, bruă mdrao mgŭn, klei bi mguôp tar rŏng lăn, alŭ wăl. Klei nao čuă anei lŏ hdơ̆ng đru rơ̆ng kjăp knhuah gru jăk siam hlăm klei mjĕ mgiăm Lào - Việt Nam.

 Y Ƀel pô mblang