VOV4.Êđê - Ăt hlăm hdră nao čhưn klă klơ̆ng ti ala čar Lao, Khua lăn čar Nguyễn Xuân Phúc mbĭt hŏng mô̆ ñu nao čuă êmuh, blŭ hrăm hŏng phung knuă druh ti Anôk bruă bi ala Việt Nam ti Lao lehanăn bi ala êpul êya mnuih Việt Nam, phung mă bruă duh mkra, phung hđeh hriăm hră Việt Nam dôk duh bi liê, hriăm hră m’ar ti Lao. Khua lăn čar Nguyễn Xuân Phúc mñă klă, gưl nao čhưn ba wĭt leh klei tŭ dưn kluôm ênŭm, kbiă hriê mơ̆ng klei đru mguôp lehanăn mă bruă tŭ dưn mơ̆ng Anôk bi ala, mbĭt hŏng klei sa ai mơ̆ng êpul êya mnuih Việt Nam dôk hdĭp lehanăn mă bruă ti Lao. Khua lăn čar mñă klă, 100 êbâo čô mnuih Việt Nam ti Lao mđing nanao kơ ala čar, jih ai tiê đru kơ mnuih ƀuôn sang hlăm ala čar tơdah tuôm hŏng klei dleh dlan kyua klei yan adiê ngă lehanăn klei ruă Covid 19. Hluê anăn, Khua lăn čar Nguyễn Xuân Phúc čang hmăng êpul êya mnuih Việt dôk hdĭp tinei lŏ dơ̆ng mđĭ lar knhuah gru, čiăng kơ grăp čô ƀuôn sang ala čar Việt Nam hdĭp lehanăn mă bruă ti Lao jing sa gru mngač, djŏ jing mnuih Việt Nam./.

H Nêc pô mblang