VOV4.Êđê- Tlam 15-7, ti Anôk bruă knŭk kna, Khua lăn čar Nguyễn Xuân Phúc mâo leh klei bi bi trông hlăm đĭng blŭ hŏng Khua mil čhil ala čar Indonesia Joko Widodo kơ klei bi hgŭm dua nah ăt msĕ mơh dŭm bruă krĭng wăl leh anăn quốc tế hdơ̆ng bi mđing. Dua khua gĭt gai tŭ ư mđĭ ktang klei bi hgŭm, bi kah mbha klei thâo hlăm hdră mdrơ̆ng hŏng klei ruă Covid-19 leh anăn ba yua vac cin tŭ dưn. Khua mil čhil Joko Widodo  bi mni kơ klei tŭ Việt Nam hlăm bruă hluê ngă hdră kñăm mdua, ktuê dlăng jăk klei ruă tưp, mđĭ kyar bruă duh mkra ala ƀuôn. Khua lăn čar Nguyễn Xuân Phúc bi juh klei dleh dlan Indonesia dôk tlă anăp hlăm hdră mdrơ̆ng hŏng klei ruă Covid-19, đaŏ knang Indonesia srăng hnưm ktuê dlăng klei ruă tưp leh anăn krŭ wĭt bruă duh mkra. Khua lăn čar mni lač jăk kơ Indonesia bi hgŭm jăk hŏng Việt Nam hlăm bruă răng mgang mnuih ƀuôn sang tuôm hŏng klei dleh dlan kyua klei ruă Covid-19, akâo kơ Indonesia lŏ dơ̆ng mjing klei găl kơ mnuih ƀuôn sang Việt Nam ti Indonesia dưi ksiêm mkă, bi ktlah hjăn leh anăn mdrao mgŭn hlăm boh klei čiăng êdi.

Pô mblang: H’Zawut Ƀuôn Yă