VOV4.Êđê - Hmư̆ asăp jak iêu mơ̆ng Khua gĭt gai Đảng, Khua lăn čar Lao Thonglun sisulit, Khua lăn čar Nguyễn Xuân Phúc hŏng mô̆ ñu ngă khua êpul gưl dlông Việt Nam nao čhưn ti ala čar Lao mơ̆ng hruê 9-10 mlan 8/2-21. Hruê 9-8, ti Anôk bruă Khua lăn čar, Khua gĭt gai Đảng, Khua lăn čar Lao Thonglun sisulit leh anăn mô̆ ñu gĭt gai knăm drông Khua lăn čar Nguyễn Xuân Phúc leh anăn mô̆ gơ̆ hŏng klei bhiăn yuôm bhăn hĭn khua păn kŏ ala čar. Hlăm klei bi blŭ hrăm klă sĭt, Dua khua gĭt gai bi êdah klei mơak kơ klei đĭ kyar jăk siam mơ̆ng klei bi hgŭm plah wah dua ala čar hlăm wưng êgao leh anăn pioh lu mmông bi trông kơ dŭm hdră msir čiăng bi đru msir mgaih dŭm klei dleh dlan kyua klei ruă Covid-19 ngă kơ dŭm ala čar leh anăn hŏng klei bi hgŭm Việt Nam - Lào; mbĭt anăn bi tŭ ư mđĭ klei bi hgŭm hlăm jih jang bruă, mơ̆ng bruă kđi čar, hŏng tač êngao, răng mgang klei êđăp ênang, mtô bi hriăm, bruă duh mkra, mnia blei, duh bi liê, pui kmlă, dhar kreh, hdră mnêč kreh knhâo… čiăng hrăm mbĭt hgao klei dleh dlan, ba yua jih klei găl mơ̆ng bruă tuh mkra mjing 4.0.

H Zawut pô mblang