VOV4.Êđê - Hruê 24-5, Khua lăn čar Nguyễn Xuân Phúc bi trông hŏng Khua gĭt gai Trung Quốc Tập Cận Bình. Hlăm klei bi trông, Khua lăn čar Nguyễn Xuân Phúc bi mklă Đảng leh anăn Knŭk kna Việt Nam kjăp ktang hluê ngă hdră êlan hŏng tač êngao, êngiê, lu tĭng, hlăm anăn mđĭ kyar klei bi hgŭm hŏng ala čar riêng gah, bi hgŭm kluôm hŏng Trung Quốc.

Khua lăn čar lač dŭm hdră phŭn mđĭ klei bi hgŭm dua ala čar hlăm wưng kơ anăp msĕ si hyuă kjăp klei đaŏ knang, mđĭ klei bi hgŭm kluôm ênŭm, mtăp mđơr, hdơ̆ng mâo klei tŭ dưn. Khua gĭt gai Đảng, Khua lăn čar Trung Quốc Tập Cận Bình bi êdah klei đaŏ knang ti gŭ klei gĭt gai klă mngač mơ̆ng Đảng Cộng sản Việt Nam, mnuih ƀuôn sang Việt Nam srăng ngă tŭ dưn dŭm hdră kñăm, bruă klam Klei bi kƀĭn Đảng tal XIII kčah leh. Ñŭ mñă klă, čang hmăng leh anăn srăng gĭr mbĭt hŏng Đảng, knŭk kna leh anăn mnuih ƀuôn sang Việt Nam lŏ dơ̆ng mđĭ ktang klei bi hgŭm dua ala čar, ba klei bi hgŭm hdră ngă bruă kluôm Việt Nam - Trung Quốc đĭ kyar hĭn.

H’ Zawut pô mblang